តើអ្វីទៅជាជំងឺផ្លូវចិត្ត?
ជំងឺផ្លូវចិត្តគឺជាជំងឺម្យ៉ាងកើតមានចំពោះមនុស្សម្នាក់ ប៉ះពាល់ដល់អារម្មណ៍ ការគិត អាកប្បកិរិយា មានការប្រែប្រួលជំនឿ និងបុគ្គលិកលក្ខណៈ ហើយបង្កឡើងនូវផលអវិជ្ជមានប៉ះពាល់ដល់ការរស់នៅរបស់គាត់ ការបំពេញការងារ ឬចំពោះជីវិតគ្រួសាររបស់គាត់។
ជំងឺផ្លូវចិត្ត មានរួមទៅដោយបញ្ហាសុខភាពជាច្រើន។ មនុស្សភាគច្រើនគិតឃើញថា ជំងឺផ្លូវចិត្ត គឺជាជំងឺដែលពាក់ព័ន្ធទៅនឹងបញ្ហាអាកប្បកិរិយាធ្ងន់ធ្ងរ ដូចជាអំពើហិង្សា ភាពជ្រួលច្របល់ និងការប្រព្រឹត្តកាមគុណដោយឥតសមរម្យ។
ជាទូទៅបញ្ហាទាំងនេះ ពាក់ព័ន្ធទៅនឹងវិបល្លាសផ្លូវចិត្តធ្ងន់ធ្ងរ ទោះយ៉ាងនេះក្តី មានមនុស្សជាច្រើននាក់ដែលមានជំងឺផ្លូវចិត្ត តែមិនមានអាកប្បកិរិយា ឬលក្ខណៈខុសប្លែកអ្វីពីមនុស្សដទៃនោះទេ។ ជំងឺផ្លូវចិត្តទាំងនេះរួមមាន ជំងឺធ្លាក់ទឹកចិត្ត ជំងឺថប់បារម្ភ បញ្ហាកាមគុណ និងបញ្ហាញៀនសុរា ឬគ្រឿងញៀន។