ទំនាក់ទំនងរវាងសុខភាពផ្លូវចិត្តនិងសុខភាពផ្លូវកាយ
យើងគប្បីយកចិត្តទុកដាក់ឲ្យបានច្រើនចំពោះសុខភាពល្អជាទូទៅ ជាជាងមានសុខភាពតែផ្នែករាងកាយ ព្រោះថាមនុស្សម្នាក់ដែលមានសុខភាពល្អ គប្បីមានសុខភាពផ្លូវចិត្តល្អផងដែរ។
មនុស្សម្នាក់ដែលមានសុខភាពល្អអាចមានសមត្ថភាពគិតគូរបានល្អ អាចដោះស្រាយបញ្ហានានាក្នុងជីវិតរស់នៅបានល្អ ការធ្វើទំនាក់ទំនងប្រកបដោយភាពរីករាយជាមួយមិត្តភក្តិ ជាមួយសហការីនៅកន្លែងការងារ និងជាមួយក្រុមគ្រួសារ មានអារម្មណ៍សុខស្រួលក្នុងចិត្ត និងនាំមកនូវភាពសប្បាយរីករាយចំពោះមនុស្សដទៃក្នុងសហគមន៍ដែលគាត់រស់នៅ។
ទោះបីជាយើងនិយាយអំពីចិត្ត និងរាងកាយ ហាក់បីដូចជាដោយឡែកពីគ្នាក្ដី តែតាមពិត ចិត្តនិងកាយផ្សារភ្ជាប់គ្នាយ៉ាងជិតដិត គឺដូចគ្នាទៅនឹងផ្នែកម្ខាងៗនៃកាក់មួយ ផ្នែកទាំងពីរនេះមានទំនាក់ទំនងជាមួយគ្នាទៅវិញទៅមក។ ប្រសិនបើផ្នែកណាមួយទទួលរងការប៉ះពាល់ នោះផ្នែកមួយទៀតក៏អាចទទួលផលប៉ះពាល់ផងដែរ។ ការនិយាយអំពីចិត្ត និងកាយផ្សេងពីគ្នា មិនមែនបានន័យថាវាមានលក្ខណៈដាច់ដោយឡែកពីគ្នានោះឡើយ។
ដូចគ្នាទៅនឹងរាងកាយដែលអាចមានជំងឺ ចិត្តក៏អាចមានជំងឺបានដែរ ដែលយើងអាចហៅបានថាជាជំងឺផ្លូវចិត្ត។