១. Antisocial Personality Disorder
មានលក្ខណៈនៃការមិនយកចិត្តទុកដាក់ ឬរំលោភសិទ្ធិអ្នកដទៃ។ បុគ្គលប្រភេទនេះ នឹងមិនគោរពតាមបទដ្ឋានសង្គម ហើយអាចនិយាយកុហកឬបោកបញ្ឆោតអ្នកដទៃម្តងហើយ ម្តងទៀត ឬក៏អាចធ្វើសកម្មភាពតាមសន្ទុះចិត្ត និងសេចក្តីចង់បានរបស់ខ្លួនភ្លាមៗ។

២. Avoidant Personality Disorder
មានលក្ខណៈ នៃភាពអៀនខ្មាស់ខ្លាំង ការមានអារម្មណ៍ថាខ្លួនឯងមិនគ្រប់គ្រាន់ពេញលក្ខណៈ និងឆាប់ទទួលអារម្មណ៍ខ្លាំងចំពោះការរិះគន់ផ្សេងៗ។ បុគ្គលនេះអាចនឹងមិនចង់ចូលរួមសកម្មភាពសង្គមនានា ដោយសារតែពួកគាត់តែងតែចូលចិត្តខ្វល់ខ្វាយ នឹងការរិះគន់ ឬពីការច្រានចោលពីអ្នកដទៃ ឬក៏តែងចាត់ទុកខ្លួនឯង ថាមិនល្អគ្រប់គ្រាន់ ឬអសមត្ថភាពក្នុងសង្គម។

៣. Borderline Personality Disorder
ជាគំរូនៃអត្តចរិត ដែលមានលក្ខណៈមិននឹងនរ ក្នុងទំនាក់ទំនងផ្ទាល់ខ្លួន មានអារម្មណ៍ពុះកញ្ជ្រោលខ្លាំង ពោរពេញដោយរូបភាពមិនល្អនៅក្នុងខ្លួន និងមានបញ្ហាក្នុងការគ្រប់គ្រងខ្លួនឯង។ បុគ្គលនោះ អាចនឹងព្យាយាមជៀសចេញពីការត្រូវគេបោះបង់ចោល មានការប៉ុនប៉ងធ្វើអត្តឃាតម្តងហើយម្តងទៀត តែងតែបង្ហាញកំហឹងមិនសមរម្យ ឬកើតមានអារម្មណ៍ឯកោរ សឹងគ្រប់ពេលវេលា។

៤. Dependent Personality Disorder
ជាគំរូនៃអត្តចរិត ដែលទាមទារការយកចិត្តទុកដាក់មកលើខ្លួន និងមានអារម្មណ៍ពឹងផ្អែកខ្លាំងទៅលើអ្នកជុំវិញ ដោយមានអាកប្បកិរិយារុញរារច្រើន។

៥. Narcissistic Personality Disorder
ជាគំរូនៃអត្តចរិត ដែលទាមទារឱ្យមានការកោតសរសើរខ្លាំងមកលើខ្លួន ហើយខ្វះការយល់ចិត្តលើអ្នកដទៃ។ បុគ្គលនោះអាចយល់ថាខ្លួនឯងមានសារៈសំខាន់ជាងគេ មានសិទ្ធិគ្រប់យ៉ាងអាចកេងចំណេញពីអ្នកដទៃនិងមិនយល់ចិត្តនរណាទាំងអស់។

៦. Histrionic Personality Disorder
ជាគំរូនៃអត្តចរិត ដែលទាមទារឱ្យគេយល់តែពីអារម្មណ៍និងផ្តល់ការយកចិត្តទុកដាក់មកលើខ្លួនច្រើនហួសហេតុ។ បុគ្គលនោះ អាចនឹងមានអារម្មណ៍មិនសុខស្រួលនៅពេលដែលគេមិនមែនជាចំណុចកណ្តាលនៃការយកចិត្តទុកដាក់។
ពួកគេអាចប្រើរូបរាងកាយ ដើម្បីទាក់ទាញចំណាប់អារម្មណ៍ មកលើខ្លួនហើយអាចមានអារម្មណ៍ ផ្លាស់ប្តូរ ឬឡើងចុះយ៉ាងឆាប់រហ័ស។

៧. Obsessive Compulsive Personality Disorder
ជាគំរូនៃអត្តចរិត ដែលមានការខ្វល់ខ្វាយខ្លាំងពីការមានសណ្តាប់ធ្នាប់ និងត្រូវការភាពឥតខ្ចោះ។ បុគ្គលនោះអាចផ្តោតអារម្មណ៍ខ្លាំងពេក ទៅលើភាពលំអិតនៃការងារដែលជាហេតុធ្វើឱ្យគាត់អាចធ្វើការច្រើនហួសហេតុ ហើយគ្មានពេលទំនេរសម្រាប់ខ្លួនឯង មិត្តភ័ក្រ និងក្រុមគ្រួសារ។
ទំលាប់របៀបនេះ មានលក្ខណៈមិនអាចបត់បែនបាន ហើយមិនសមនឹងគុណតម្លៃ ដែលពួកគាត់បានធ្វើ។

៨. Paranoid Personality Disorder
ជាគំរូនៃអត្តចរិត ដែលតែងមានការសង្ស័យទៅលើអ្នកដទៃ ហើយនិងមើលទៅអ្នកដទៃថា តែងធ្វើអំពើអាក្រក់ ឬគួរឱ្យស្អប់ខ្ពើម។ បុគ្គលនោះ តែងតែប៉ាន់ស្មានថា អ្នកជុំវិញខ្លួនគាត់នឹងធ្វើបាប ឬបោកបញ្ឆោតខ្លួន ហើយនឹងមិនទុកចិត្តអ្នកដទៃ ឬឱ្យគេចូលជិតពួកគេជាដាច់ខាត។

៩. Schizoid Personality Disorder
ជាគំរូនៃអត្តចរិត ដែលបានផ្តាច់ចេញពីទំនាក់ទំនងសង្គមនិងអាចបង្ហាញអារម្មណ៍តិចតួចមកក្រៅ។ បុគ្គលនោះ តែងតែមិនស្វែងរកទំនាក់ទំនងជិតស្និទ្ធជាមួយអ្នកដទៃ ហើយតែងជ្រើសរើសការរស់នៅតែម្នាក់ឯង ដោយមិនយកចិត្តទុកដាក់ចំពោះការសរសើរ ឬការរិះគន់ពីអ្នកដទៃឡើយ។

១០. Schizotypal Personality Disorder
ជាគំរូនៃអត្តចរិត ដែលមានភាពមិនសុខស្រួលខ្លាំង ក្នុងទំនាក់ទំនងជិតស្និទ្ធជាមួយអ្នកដទៃ ដោយមានការគិតខុសនិងអាកប្បកិរិយាប្លែកៗ។ បុគ្គលនោះ អាចមានជំនឿប្លែកៗ ឬអាកប្បកិរិយានិងការនិយាយប្លែកៗ ឬអាចមានសញ្ញាថប់បារម្ភ ក្នុងសង្គមហួសហេតុ។

ការធ្វើរោគវិនិច្ឆ័យនៃ ជំងឺអត្តចរិត តម្រូវឱ្យអ្នកជំនាញសុខភាពផ្លូវចិត្ត ពិនិត្យមើលគំរូបុគ្គលិកលក្ខណៈប្រចាំថ្ងៃ រយៈពេលវែង និងបណ្តុំរោគសញ្ញាជាក់លាក់មួយចំនួន។ ការធ្វើរោគវិនិច្ឆ័យត្រូវបានធ្វើឡើងជាធម្មតា ចំពោះមនុស្សដែលមានអាយុចាប់ពី ១៨ឆ្នាំឡើងទៅ។ មនុស្សដែលមានអាយុក្រោម១៨ឆ្នាំ ជាទូទៅមិនត្រូវបានគេធ្វើរោគវិនិច្ឆ័យ ថាមានជំងឺអត្តចរិតទេ ពីព្រោះបុគ្គលិកលក្ខណៈរបស់ពួកគេកំពុងតែនៅមានការអភិវឌ្ឍ។ មនុស្សខ្លះ ដែលមានបញ្ហាអត្តចរិត ប្រហែលជាមិនស្គាល់ និងយល់ពីបញ្ហានោះទេ។ ដូចគ្នាផងដែរមនុស្សអាចមានជំងឺអត្តចរិតច្រើនជាងមួយប្រភេទ។ ប្រហែលជា៩ភាគរយនៃមនុស្សពេញវ័យ មានជំងឺអត្តចរិត យ៉ាងហោចណាស់មួយប្រភេទ។