មនុស្សគ្រប់រូប អាចមានបញ្ហាសុខភាពផ្លូវចិត្ត រួមទាំង ខ្លួនយើង សមាជិកគ្រួសារឬ មិត្តភ័ក្តិ របស់យើង។ ភាពធ្ងន់ធ្ងរនៃជំងឺផ្លូវចិត្តមានលក្ខណៈផ្សេងៗគ្នាពីស្រាលទៅធ្ងន់ និងអាចមានភាពរ៉ាំរៃ៉ផងដែរ។ ប៉ុន្តែជំងឺផ្លូវចិត្តទាំងនោះពិតជាអាចត្រូវបានគេធ្វើរោគវិនិច្ឆ័យនិងព្យាបាលប្រកបដោយប្រសិទ្ធភាព។ អ្នកជំងឺភាគច្រើន អាចជាសះស្បើយ និងត្រឡប់ទៅរស់នៅក្នុងស្ថានភាព”ធម្មតា”របស់ពួកគេវិញបន្ទាប់ពីការព្យាបាល។ ហើយឱសថព្យាបាលជំងឺផ្លូវចិត្ត ជាធាតុសំខាន់ក្នុងការជួយអ្នកជំងឺផ្លូវចិត្តអោយបានសះស្បើយដោយជោគជ័យ។

ការព្យាបាលជំងឺផ្លូវចិត្តដែលមានប្រសិទ្ធភាពបំផុត គួរតែធ្វើឡើងដោយ អ្នកជំនាញសុខភាពផ្លូវចិត្តដូចជា វេជ្ជបណ្ឌិតឯកទេសជំងឺផ្លូវចិត្ត អ្នកចិត្តសាស្ត្រគ្លីនិក និងបុគ្គលិកសង្គមកិច្ចជាដើម។ ខណៈពេលដែលមានតែ វេជ្ជបណ្ឌិតឯកទេសជំងឺផ្លូវចិត្ត ទេដែលអាចចេញវេជ្ជបញ្ជាឱសថសំរាប់ការព្យាបាលដ៏មានប្រសិទ្ធភាព។

ជាការពិតណាស់ ក្នុងការព្យាបាលជំងឺផ្លូវចិត្ត ក៏ដូចជាការព្យាបាលជំងឺរាងកាយដទៃទៀតដែរ។គឺទាមទារអោយអ្នកជំងឺសហការណ៍និងគោរពតាមវេជ្ជបញ្ជារបស់គ្រូពេទ្យ ដូចជា លេបថ្នាំអោយបានទៀងទាត់មិនបន្ថយរឺតំលើងថ្នាំដោយខ្លួនឯង មិនបញ្ឈប់ថ្នាំដោយខ្លួនឯង ត្រូវរាយការណ៍ពីការរំខាននៃថ្នាំក៏ដូចជាមិនត្រូវប្រងើយកន្តើយនឹងការមានគំនិតចង់សំលាប់ខ្លួនជាដើម។

បញ្ហាសុខភាពផ្លូវចិត្តភាគច្រើនត្រូវបានព្យាបាលយ៉ាងល្អបំផុត មិនត្រឹមតែជាមួយនឹងឱសថប៉ុណ្ណោះទេថែមទាំងព្យាបាលបែបចិត្តសាស្ត្រក្នុងពេលតែមួយទៀត ផងដែរ។

ឱសថសំរាប់ព្យាបាលជំងឺផ្លូវចិត្ត មានដូចជា៖

• ឱសថព្យាបាលជំងឺធ្លាក់ទឹកចិត្ត៖
សំរាប់ព្យាបាលជំងឺធ្លាក់ទឹកចិត្ត ជំងឺថប់បារម្មណ៍និងជំងឺផ្លូវចិត្តមួយចំនួនទៀត។ឱសថក្រុមនេះអាចធ្វើអោយធូរស្រាលនៅភាពទុក្ខព្រួយ សោកសៅ អស់សង្ឃឹម អស់កំលាំង បាត់ចំណូលចិត្តនិងភេ្លចភ្លាំងជាដើម។ឱសថព្យាបាលជំងឺធ្លាក់ទឹកចិត្ត មិនមានភាពញៀនទេ។

• ឱសថព្យាបាលជំងឺវិកលចរិក៖
សំរាប់ព្យាបាលជំងឺផ្លូវចិត្តនិងខួរក្បាល ដែលមានរោគសញ្ញាវិកលចរិកដូចជា ជំងឺវិកលចរិកជំងឺបាយប៉ូឡា ជំងឺធ្លាក់ទឹកចិត្តដែលមានរោគសញ្ញាវិកលចរិក។ ដូចគ្នាដែរ វាក៏អាច យកទៅប្រើក្នុងគោលបំណង កាត់បន្ថយការ ឆេវឆាវ កាច និងឡេះឡាស់ផងដែរ។ ការប្រើប្រាស់ឱសថក្រុមនេះទាមទារអោយមានជំនាញច្បាស់លាស់ ក្នុងការគ្រប់គ្រងផលវិបាកនិងផលប្រយោជន៍របស់វាដើម្បីលើកកំពស់ប្រសិទ្ធភាពនៃការព្យាបាលនិងគុណភាពជីវិតរបស់អ្នកជំងឺ។

• ឱសថព្យាបាលជំងឺថប់បារម្មណ៍៖
ឱសថនេះត្រូវបានប្រើប្រាស់សំរាប់ព្យាបាលជំងឺថប់បារម្មណ៍ដូចជា ជំងឺថប់បារម្មណ៍ទូទៅរឺក៏ជំងឺស្លន់ស្លោរ។ វាមានប្រសិទ្ធភាពក្នុងការកាត់បន្ថយ ការតានតឹងចិត្ត ការស្លន់ស្លោរ
និងការគេងមិនលក់។ឱសថក្នុងក្រុមនេះ គួរត្រូវបានប្រើប្រាស់ក្នុងរយៈពេលខ្លីនិងមានការតាមដានពីគ្រូពេទ្យដោយសារក្តីកង្វល់ពីភាពញៀន ក៏ដូចជាការប្រើលើសវេជ្ជបញ្ជា។ជាញឹកញាប់ឱសថព្យាបាលជំងឺធ្លាក់ទឹកចិត្តត្រូវបានយកទៅប្រើរយៈពេលយូរក្នុងការព្យាបាលជំងឺថប់បារម្មណ៍ផងដែរ។

• ឱសថព្យាបាលជំងឺបាយប៉ូឡា៖
ត្រូវបានប្រើប្រាស់សំរាប់រក្សាលំនឹងទឹកចិត្តរបស់អ្នកជំងឺបាយប៉ូឡា ទាំងក្នុងកំឡុងពេលម៉េនៀ រឺក៏កំឡុងពេលធ្លាក់ទឹកចិត្ត។ក្នុងករណីខ្លះវា ក៏ត្រូវបានប្រើដើម្បីគ្រប់គ្រងការចង់ធ្វើអត្តឃាតផងដែរ។

• ឱសថព្យាបាលជំងឺវង្វេង
ភ្លេចភ្លាំង៖ ជាទូទៅត្រូវបានប្រើប្រាស់សំរាប់ការព្យាបាលជំងឺវង្វេង ភ្លេចភ្លាំងរបស់មនុស្សចាស់ក្នុងដំណាក់កាលដំបូងនិងបន្ទាប់ដើម្បីកាត់បន្ថយការវិវត្តន៍នៃការខូចខាតកោសិកាខួរក្បាល។អ្នកជំងឺត្រូវធ្វើការវាយតំលៃពីគ្រូពេទ្យជំនាញមុននឹងទទួលការព្យាបាលពីឱសថក្រុមនេះ។

• ឱសថជំនួយដំណេក៖
ត្រូវបានប្រើប្រាស់ សំរាប់លើកកំពស់គុណភាពដំណេក រឺក៏ជំរុញវដ្តដំណេកអោយកាន់តែប្រសើរឡើង។ឱសថក្នុងក្រុមនេះអាចជាឱសថដែលមានវេជ្ជបញ្ជា ក៏អាចជាឱសថដែលគ្មានវេជ្ជបញ្ជាផងដែរ។

• ឱសថជីវជាតិជំនួយខួរក្បាល៖
ប្រើប្រាស់ដើម្បីជំនួយថាមពល និងបង្កើនភាពរស់រវើក នៃខួរក្បាល ក្នុងគោលបំណងពង្រឹងការចងចាំការផ្ចង់អារម្មណ៍ ល្បឿននៃការគិត និងសុខមាលភាពផ្លូវចិត្តរបស់អ្នកជំងឺ។ ឱសថក្នុងក្រុមនេះអាចជាឱសថដែលមានវេជ្ជបញ្ជា ក៏អាចជាឱសថដែលគ្មានវេជ្ជបញ្ជាផងដែរ។